სილამაზის ინდუსტრია განსაკუთრებული ბრენდებით გვანებივრებს. ყველა დიდი ბრენდის უკან კი საოცარი შრომა, მოტივაცია, ერთობლივი მიზანი, ენთუზიაზმია… ბრენდები ჩნდებიან და ქრებიან, თუმცა, საბედნიეროდ, დღეს უამრავი ისეთი ბრენდი არსებობს, რომელიც დაუვიწყარ კვალს ტოვებს.
რა არის გადამწყვეტი, რის გამოც ირჩევ თავის მოვლის პროდუქციას?
პირადად ჩემთვის ეს არის ხარისხი. დიახ, სწორედ ხარისხი ქმნის ბრენდს “უკვდავს”. დღეს ვაპირებ, რომ საფრანგეთში გამოგზაუროთ, უფრო კონკრეტულად კი ფრანგულ, გიგანტურ კომპანიაში, რომელიც უამრავ ხარისხიან ბრენდს აერთიანებს.
ფრანგმა ქიმიკოსმა, ეჟენ პოლ ლუი შუელერმა, მეოცე საუკუნის დასაწყისში თმის საღებავის ფორმულა შეიმუშავა, სახელწოდებოთ Oreale. მგონი უკვე მიგანიშნე, კიდეც ხომ?! 1909 წელს სწორედ ამ ადამიანმა შექმნა “ლორეალი”. სიტყვა L’Oreal ორი ფრანგული სიტყვის დაკავშირებით მიიღო, რომლებიც ოქროს და შარავანდედს ნიშნავს.
“ლორეალის” თმის საღებავის ხარისხი, თავიდანვე შესანიშნავი იყო და მას მალევე გაუჩნდა უამრავი მომხმარებელი. 1920-იანი წლების ბოლოს L’Oreal-ი მთელ ევროპაში იყიდებოდა. ქიმიკოსი შულერი თავდაპირველად პროდუქციას საკუთარ ბინაში აწარმოებდა, თუმცა მალევე მოუწია გაფართოება და 1920 წელს პირველი ქარხანა ააშენა.
ლორეალი ამსხვრევდა სტერეოტიპებს. კომპანია დღითიდღე ვითარდებოდა, ლორეალმა შექმნა მზისგან დამცავი პროდუქცია, შემდგომ დაამატა სახის კანის მოვლის საშუალებები, დეკორატიული კოსმეტიკა და პარფიუმერია.
საინტერესო ფაქტები:
1974 წელს კომპანიამ თანამშრომლობა დაიწყო “ნესტლესთან”; “ლორეალს” აქვს 6 დიდი კვლევითი ცენტრი მსოფლიოს სხვადასხვა ქვეყანაში; 2006 წელს “ლორეალმა” 562 მილიონ დოლარად შეიძინა “ბოდი შოპი; 2012 წელს ააშენა ყველაზე დიდი ქარხანა ინდონეზიაში, რომელიც 100 მილიონი დოლარი დაჯდა; “ლორეალს” ეკუთვნის ისეთი ბრენდები, როგორიცაა: “გარნიერ”, “მეიბილაინი”, “ვიში”, “ბიოთერმი” და ა.შ. ბრენდს მიღებული აქვს UNESCO-ს ჯილდოები მეცნიერებაში გამოჩენილ ქალ მკვლევართა აღიარებით, რომლებმაც წვლილი შეიტანეს მეცნიერულ პროგრესში. 1997 წლიდამ L’Oreal არის კანის კინოფესტივალის ოფიციალური პარტნიორი;
L’Oreal იყო ინოვაცია სილამაზის ინდუსტრიაში, რომელმაც ყველაფერი მოიცვა. თმის საღებავების წარმოებიდან ათასობით ინდივიდუალური პროდუქტების წარმოებამდე მართლაც შრომატევადი გზა იყო. თუმცა წარმატებაც ასე მოდის, დაუღალავი შრომით, რომელიც ხარისხზეა ორიენტირებული. “ლორეალის” პროდუქცია გვხვდება სალონებში, აფთიაქებში, პარფიუმერიულ მაღაზიებში, სუპერმარკეტებში…
სილამაზის ინდუსტრია დღითიდღე ვითარდება, მაღალია კონკურენცია, შესაბამისად, კომპანიებს არ აქვთ მოდუნების საშუალება. დღეს თუ არ სთავაზობ ხარისხს, არ სთავაზობ ახალს და გაუმჯობესებულს, არ ქმნი რაღაც ისეთს, რაც დაუვიწყარია, რაც შენ შენ გხდის, აუცილებლად გაქრები. L’Oreal ძლიერი მაგალითია, თუ როგორ უნდა იყო ბაზრის ერთ-ერთი ლიდერი, ინარჩუნებდე ყოველთვის მოწინავე პოზიციას და გენდობოდნენ. დიახ, ნდობა არის ის, რის გამოც შენთან აუცილებლად დაბრუნდებიან.
გამოყენებული წყაროები:
Forbes.ge
entrepreneur.com
ფოტომასალა: Pinterest
