ვის უყვარს ნემსის ჩხვლეტა?
აკუპუნქტურა დღეს მთელს მსოფლიოშია გავრცელებული, დასავლეთის ქვეყნებში ის ალტერნატიული მედიცინის ერთ-ერთი სახეობაა.
რას ნიშნავს აკუპუნქტურა?
ეს არის ნემსებით თერაპია, რეფლექსოთერაპია და ტრადიციული ჩინური მედიცინის საინტერესო მიმართულებაა, მკურნალობის უძველესი ჩინური მეთოდი. თავად სიტყვა “აკუპუნქტურა” წერტილოვან ზემოქმედებას ნიშნავს, ანუ ეს მეთოდი გულისხმობს სხეულის განსაზღვრულ წერტილებზე ზემოქმედებით მკურნალობას. ეს წერტილები სხეულის იმ ადგილებზეა, სადაც ბევრი სისხლძარღვი და ნერვული დაბოლოებებია.
ახლა კი ერთი ჩინური ლეგენდის შესახებ უნდა გიამბო:
ხუთი ათასი წლის წინ ერთ მხედართმთავარს ძალიან აწუხებდა წელს ქვემოთ ტკივილი, აი წარმოიდგინე, როგორც საჯდომი ნერვის ანთება. ბრძოლის დროს ჩვენს მხედართმთავარს ისარი აქილევსის მყესში მოხვდა და ჰოი საოცრებავ, ტკივილი გაქრა. მხედართმთავარმა გაიმარჯვა ბრძოლაშიც და ტკივილზეც, სახლში დაბრუნებულმა კი გადაწტვიტა, ეპოვა ჯარისკაცი, ვისაც იგივე ტკივილი აწუხებდა და მისთვის ისარი ეჩხვლიტა. ცდამ გაამართლა, ჯარისკასცაც გაუქრა ტკივილი და ეს ამბავი ჩინეთს მოედო.
და მაინც, რეალურად სად წარმოიშვა აკუპუნქტურის მეთოდი, არავინ იცის. ინგლისის ერთ-ერთ მუზეუმში ინახება ძველეგვიპტური პაპირუსი, რომელზეც აღწერილია ის წერტილები, სადაც ნემსით ჩხვლეტა უნდა მოხდეს. თუმცა, მაინც ჩინურ და იაპონურ ხელნაწერებში ამ მეთოდის შესახებ უფრო სარწმუნო ინფორმაციებია. აკუპუნქტურის ჩინელმა მამებმა საჩხვლეტად გამოსადეგი 700-მდე წერტილი აღმოაჩინეს. უცნობია, რას ეძახდნენ ჩინელები მათი მკურნალობის მეთოდს. ჩხვლეტა-ზეწოლით მკურნალობას “აკუპუნქტურა” ჰოლანდიელმა ექიმმა ტინ რინემ უწოდა.
აკუპუნქტურის მეთოდები განსხვავებულია, განვიხილოთ:
ჩჟენ თერაპია – უშუალოდ ნემსით ჩხვლეტას გულისხმობს;
ელექტროპუნქტურა – ასევე ნემსით ჩხვლეტაა, მაგრამ დენის გატარებით;
ცზიუ თერაპია (მოწვა) – ბიოლოგიურად აქტიურ წერტილებზე მაღალი ტემპერატურის ზემოქმედებას ნიშნავს;
წერტილოვანი მასაჟი – ანუ იგივეა, რაც თითებით ზემოქმედება;
ვაკუუმ თერაპია – ეს მეთოდი საკმაოდ პოპულარულია საქართველოშიც. ვაკუუმ თერაპიის დროს გახურებულ მომრგვალო ქილებს ზურგზე ალაგებენ;
სუ-ჯოკ თერაპია – გულისხმობს მტევნისა და ტერფის ბიოაქტიურ წერტილებზე ზემოქმედებას;
შიაცუ – მასაჟის სახეობაა, რომელიც თითებით და ხელისგულებით კეთდება;
ბაუნშეიტიზმი – ამ მეთოდის დროს კანქვეშ საკმაოდ ბევრი ნემსი შეჰყავთ.
აკუპუნქტურა საკმაოდ ეფექტურია გულ-სისხლძარღვთა, საჭმლის მომნელებელი, სასუნთქი, საშარდე და სხვა დაავადებების დროს. ეს პროცედურა აუმჯობესებს ქსოვილების აღდგენის პროცესს და ორგანოების სისხლით მომარაგებას. ამცირებს კუნთების სპაზმს, ანთებას და შეშუპებას. “ჩხვლეტით მკურნალობას”, რა თქმა უნდა, სპეციალური ნემსი სჭირდება. ნემსებს ჯერ თავზე და სახეზე არჭობენ, შემდეგ მოდის ზურგი და მუცელი, ბოლოს კი ფეხები და ხელები. (მგონი ცდად ღირს, არა?!)
აკუპუნქტურას უამრავი ცნობილი ადამიანი მიმართავს. მის ეფექტურ გავლენაზე სოციალურ მედიაში წერდნენ კიმ კარდაშიანი, რობერტ დაუნი უმცროსი, სელინ დიონი და სხვა.
ახლა კი რამდენიმე საინტერესო ფაქტი: პრეზიდენტმა ნიქსონმა ხელი შეუწყო აკუპუნქტურის განვითარებას 1970-იან წლებში, როცა გადაუდებელი ოპერაციის შემდგომ იტარებდა თერაპიას პოსტ ოპერაციული ტკივილის შესამსუბუქებლად. სელინ დიონი მიმართავდა აკუპუნქტურას ინვიტრო განაყოფიერების პერიოდში, ფეხმძიმობის ხელშესაწყობად. ტყუპების წარმატებით ჩასახვის შემდეგ, მან აკუპუნქტურის გამოყენება ურჩია მერაია ქერის.
აკუპუნქტურა კარგია უძილობის და დეპრესიის დროსაც, ამცირებს ტკივილს მუხლების, კისრის, მხრების, ყბის, ზურგის ქვედა ნაწილში. კარგია რადიკულიტის, შაკიკის, ძლიერი თავის ტკივილის დროსაც… და მაინც, თუ ჩხვლეტის გეშინია, უნდა იცოდე, რომ აკუპუნქტურა არ არის მტკივნეული. თითოეული ნემსი არის ძალიან თხელი, სტერილური, დამზადებულია უჟანგავი ფოლადისგან და განკუთვნილია ერთჯერადი გამოყენებისთვის.
ასე რომ, არ შეუშინდე!
გამოყენებული წყაროები:
premierechiro.com
aversi.ge
mkurnali.ge
ფოტომასალა: Pinterest
