“თვალები ჩიკო, ისინი არასოდეს ტყუიან”..
ალბათ, ყველამ იცით ეს ფრაზა ცნობილი
ფილმიდან Scarface – ნაიარევი სახე.
მართლაც, თვალები მრავლისმეტყველია.
აი, თვალებზე ხომ ამბობენ, სულის სარკეაო, ზუსტად.
ადამიანის სიღრმე მოდის თვალებიდან.
მწვანე, შავი, ცისფერი, თაფლისფერიი… მნიშვნელობა არ აქვს, თვალებით უცქერ სამყაროს, ყველაფერს ხედავ და ეს უკვე ნიშნავს, რომ ცოცხალი ხარ.
სხეულის მნიშვნელოვანი ნაწილი მაკიაჟის სამყაროშიც მრავლისმთქმელია. სწორედ თვალის მაკიაჟი ქმნის დიდებულ შტრიხს. მნიშვნელოვანია სილამაზის, ჭრილის, ფორმის, ფერის ხაზგასმა და თქვენ წარუშლელ კვალს დატოვებთ ადამიანებზე. შესაბამისად საჭიროა მაკიაჟის ტექნიკის ცოდნა, თუმცა არანაკლებ მნიშვნელოვანია, ხარისხიანი დეკორატიული კოსმეტიკის შერჩევა. ლაინერი, ფანქარი, ჩრდილები, ტუში და ა.შ. შენ რას იყენებ ყველაზე ხშირად თვალებისთვის?
დღეს ჩემს საყვარელ და განუყრელ მეგობარზე უნდა მოგიყვე დეკორატიული კოსმეტიკიდან. ეს არის თვალის ტუში. მაკიაჟის ბოლო გაელვება – ასე დავარქმევდი. კარგი ტუში იდეალური მაკიაჟის სწორედ დასკვნითი ნაწილია. აპრეხილი წამწამები, მოცულობითი, მოელვარე, მეტყველი…
სხვათაშორის, ერთ-ერთი კვლევის თანახმად, ტუშის შეძენისას ყოველი მეოთხე ქალი ფასით ხელმძღვანელობს, ყოველი მეორე – ბრენდის სახელწოდებით, ყოველი მეხუთე – ფუნჯის ფორმით. (ფუნჯის ფორმას მართლაც დიდი მნიშვნელობა აქვს)
აი მაგალითად: კლასიკური ფუნჯი ხშირი წამწამების ეფექტს იძლევა, კონუსის ფორმის ფუნჯი პატარა თვალებისთვის იდეალურია, ნახევარმთვარის ფორმის ფუნჯი კარგია ბუნებრივად სწორი წამწამებისთვის. თუ ტუშის წასმა გიჭირს, მაშინ წვრილი ფუნჯი დაგჭირდება, ხოლო რაც შეეხება სრულყოფილებას – ამის მისაღწევად თხელი, სავარცხლისმაგვარი ფუნჯი უნდა გამოიყენო.
საინტერესოა, რამდენი მომხმარებელი ადევნებს თვალს შემადგენლობას?! მოდი ერთად გავიგოთ, რისგან შედგება ტუში. გასაკვირი არაა, რომ ყველა ბრენდს სხვადასხვა ფორმულა აქვს. არსებობს, როგორც სინთეტიკური, ისე 100%-ით ბუნებრივი ნარევები. ტუშის 60 პროცენტი ძირითადად წყალია, 15 პროცენტამდე ცვილისგან შედგება, 10 პროცენტამდე – ფერის პიგმენტი, 5 პროცენტამდე კი – შემკვრელი, შემასქელებელი ემულგატორისგან.
როგორი უნდა იყოს კარგი ტუში?
არ უნდა შრებოდეს ძალიან სწრაფად, მნიშვნელოვანია, რომ იყოს საკმარისად თხევადი, რომ ყველა ღერი დაფაროს, კარგად უნდა ეკვროდეს წამწამს და მარტივად შორდებოდეს. კარგი ტუში უნდა შეიცავდეს ბუნებრივი წარმოშობის მინერალურ პიგმენტებს, ბუნებრივ ზეთებსა და მცენარეულ ექსტრაქტებს, რომლებიც აღადგენენ წამწამის ღერებს და ხელს უშლიან ცვენას. ჯანსაღ წამწამებს ხარისხიანი ტუში სჭირდება.
სხვათაშორის, ტუშის გამოყენების პირველი კვალი ძველ ეგვიპტეში, ჩვენს წელთაღრიცხვამდე 3000 წლით თარიღდება. ტუშის შენახვა-მოხმარების ვადა დაახლოებით, 3-5 თვეა.
არ დაიძინო ტუშით, რადგან როცა ტუში ღამის განმავლობაში შრება, წამწამების ცვენას იწვევს.
მთავარია, სწორად შეარჩიო პროდუქტი და მისი ფუნჯის ფორმა, ასე შეინარჩუნებ წამწამების სიჯანსაღეს და წარმოაჩენ თვალების სილამაზეს.
ჩემო მკითხველო, როცა თვალები ბრწყინავს, ეს ნიშნავს, რომ ბედნიერი ხარ!
მეც ამას გისურვებ, დაე, სულ იბრწყინოს შენმა თვალებმა!
გამოყენებული წყაროები:
aversi.ge, wikipedia
ფოტომასალა: Pinterest
