შუა საუკუნეებში, აი მორალს რომ ქადაგებდნენ, ის ადამიანები მიიჩნევდნენ, რომ ქალის სურვილი – გახდეს უკეთესი და გაიუმჯობესოს საკუთარი გარეგნობა, – ცოდვაა.
“მათი გზა, ვინც თმებს იხუჭუჭებს, პირდაპირ ჯოჯოხეთში მიდის, რადგან სხვა გზა არ არსებობს”, – ნათქვამია შუასაუკუნეების დროინდელ ერთ-ერთ პიესაში.
ჰმმ, ალბათ მიხვდი, წინ გელოდება ბევრი თმა, ვარცხნილობა და მათ შესახებ საინტერესო ფაქტები.
ერთი კითხვა მაქვს, ხშირად იცვლი ვარცხნილობას?
საიდუმლოდ გეტყვი, მე ძალიან ხშირად. მიყვარს ექსპერიმენტები: ზოგჯერ სწორი, ზოგჯერ ხვეული, მოკლე ვარცხნილობები, (რომლებმაც მიჩვევა იცის), გადახოტრილი თმა, რომელიც ძალიან კომფორტულია…
მგონი, ყველაფერი ვცადე…
შევთანხმდეთ, რომ ვარცხნილობას დიდი მნიშვნელობა აქვს.
ის შეიძლება იყოს შთამბეჭდავი, მიმზიდველი, ექსტრავაგანტული, მნიშვნელოვანი შტრიხი ჩვენს სახეზე.
ვფიქრობ, მთავარი საკუთარი სტილის პოვნაა, შემდეგ ვარცხნილობის შერჩევაც მარტივია. უნდა გესმოდეს და ხედავდე, რა უხდება შენს სახეს და ვარცხნილობასაც იმის მიხედვით ატარებ.
რა თქმა უნდა, პროფესიონალი სტილისტებიც შეგიძლია დაიხმარო, ვინც კარგად აღიქვამს შენს გარეგნობას და ვისაც შეუძლია დაგეხმაროს, სწორად შეგარჩევინოს.
თმა ორგანიზმის ერთ-ერთი რთული ნაწილია. ის ცოცხლობს, კვდება, იზრდება, ცვივა… თმას თვითწარმოქმნის უნარი აქვს.
რა არის ვარცხნილობა? – ეს არის თმის ფიგურული დავარცხნა, შეჭრა, გასწორება, დახვევა. არსებობს ყოველდღიური, სადღესასწაულო ვარცხნილობები, ვარცხნილობა შეიძლება იყოს ავანგარდული, მინიმალისტური, კლასიკური, კონსერვატული, უნისექსი და ა.შ.
დღეს მარტივია სწორი თმიდან ხვეულზე გადასვლა, ან პირიქით. ალბათ, გსმენია, თმის ქიმიური დახვევის შესახებ, ის 1906 წელს გამოიგონეს. კარლ ნესლერმა ექსპერიმენტი საკუთარ ცოლზე ჩაატარა. ახლა ეს პროცედურა ბევრად უფრო უსაფრთხოა. ქიმიური დახვევის გასაკეთებლად სილამაზის სალონებში იყენებენ უახლეს კოსმეტიკურ პრეპარატებს.
ვარცხნილობებს რომ წარმოვიდგენ, შეუძლებელია ჰოლივუდში არ ვიმოგზაუროთ. ფრანგი მსახიობი, ბრიჯიტ ბარდო და მისი “ბაბეტა ვარცხნილობა” დღესაც აქტუალურია. მსახიობისთვის ვარცხნილობა ცნობილმა პარიკმახერმა, ჟაკ დესანჟმა შექმნა. ელიზაბეტ ტეილორის “ბობი”, რომელიც ასევე ერთ-ერთი მოთხოვნადი ვარცხნილობაა. ანჯელინა ჯოლიმ ლარა კროფტის როლში სადა, უბრალო ნაწნავი მოირგო, რომელიც საზოგადოებამ მაშინვე აიტაცა.
ახლა კი რამდენიმე საინტერესო ფაქტი უნდა გაგაცნო: იცოდი, რომ თოკად დაწნული თმები უძლებენ 15 ტონაზე მეტ დატვირთვას?! 1977 წელს, ელტონ ჯონი გახდა პირველი მამაკაცი, რომელმაც სახალხოდ განაცხადა თმის გადანერგვის შესახებ; სხვათაშორის, ჰაერის ტენიანობა იზომება სპეციალური ხელსაწყოს, გიგრომეტრის საშუალებით. მისი მუშაობის პრინციპი კი დაფუძნებულია ცხიმგაცლილი თმის ღერის შეკუმშვაზე; 1976 წელს ამერიკაში გაიხსნა მსოფლიოში პირველი კლუბი მელოტი მამაკაცებისთვის;
ვარცხნილობის სწორად შერჩევა ხაზს გაუსვამს შენს იმიჯს, იერსახეს, იმოქმედებს განწყობაზე და გამოკვეთს დადებით შტრიხებს. მთავარია შეინარჩუნო თმის სიჯანსაღე. გახსოვდეს, ყოველთვის შეგიძლია იყოს ის, ვინც ხარ პატარ-პატარა ცვლილებებით.
გამოყენებული წყაროები:
aura.ge
hairline.ge
intermedia.ge
ფოტომასალა: pinterest
