Oriflame – ვფიქრობ, ერთხელ მაინც გსმენიათ მის შესახებ. დღეს შემოსავლების მიხედვით, ერთ-ერთი უმდიდრესი კოსმეტიკური ბრენდის ისტორია ბევრ წელს ითვლის. ყველაფერი კი შვედეთში დაიწყო, 1967 წელს. ორმა ძმამ, იონას აფ იოხნიკმა და რობერტ აფ იოხნიკმა დააარსეს ბრენდი Oriflame.
შვედური კოსმეტიკური კომპანის პროდუქცია მრავალფეროვანია, დაახლოებით, 900 სახეობამდე. “ორიფლეიმი” 60 ქვეყანაშია წარმოდგენილი და 30 ქვეყანაში ბაზრის ლიდერი გახლავთ. ბრენდი კანის მოვლის პროდუქციასა და კოსმეტიკას ყიდის. ბუნებრივი შემადგენლობის პროდუქციის წარმოებით, კომპანიამ დიდი პოპულარობა მოიპოვა.
Oriflame-ის პირველი ხაზი შედგებოდა კანის კრემის, ტუჩსაცხისა და წამწამების ტუშისგან. პროდუქცია კი მზადდებოდა შვედური წყალმცენარეების ექსტრაქტისგან. 1970 წელს ბრენდმა პირველი კატალოგი დაბეჭდა, 1000 ეგზემპლარით.
წლიდან წლამდე კომპანია ვითარდებოდა და ახალი მიზნებისკენ მიიწევდა. გაიზარდა პროდუქცია, ბაზარზე ახალი კანის მოვლის საშუალებები გაჩნდა, ბრენდი მუდმივად იზრდებოდა როგორც გაყიდვების, ისე მარკეტინგის კუთხით. 1997 წელს Oriflame ციფრულ სამყაროში შევიდა, როცა პირველად ამოქმედდა გვერდი Oriflame.com
“უკეთესი, უფრო ლამაზი ხვალინდელი დღის შექმნა” – ეს კომპანიიის დევიზია. Oriflame ზრუნავს გარემოზე, რგავს ხეებს, იყენებს 100%-ით გადამუშავებული მასალისგან დამზადებულ ქაღალდისა და მუყაოს შეფუთვებს. სახისა და სხეულის მოვლის ყველა ახალი საშუალება შედგება 100%-ით ბიოდეგრადირებადი ფორმულებისგან.
აღსანიშნავია, რომ 2018 წლიდან “ორიფლეიმის” ყველა ობიექტზე 100%-ით განახლებადი ელექტროენერგია გამოიყენება. კომპანიას აქვს საქველმოქმედო ფონდი, რომელიც ეხმარება ბავშვებსა და ქალებს. ბრენდი იცავს გენდერულ ბალანს დასაქმებულთა შორის, კომპანიაში მუშაობს 72 ეროვნების ადამიანი. “ორიფლეიმმა” საკუთარი წარმომადგენლობა საქართველოში 2000 წელს გახსნა.
არსებობენ ბრენდები, რომლებიც ჩნდებიან და ქრებიან, მაგრამ როცა საქმე სილამაზესა და თავის მოვლას ეხება, შეუძლებელია არ გაიხსენო Oriflame. ბრენდი ნახევარსაუკუნოვანი ისტორიით, რომელმაც დროს გაუძლო და დარჩა ინდუსტრიის ერთ-ერთ ლიდერად ამ საოცარ, გიჟურ კონკურენციაში.
გამოყენებული წყაროები:
oriflame.com
unglobalcompact.ge
wikipedia
ფოტომასალა: pinterest
