“წარმატებაზე არასდროს მიოცნებია, მე მისთვის ვმუშაობდი”, – ეს ესტე ლაუდერის სიტყვებია.
ალბათ, ერთხელ მაინც გსმენია ერთ-ერთი სახელგანთქმული კოსმეტიკური კომპანიის, Estée Lauder-ის შესახებ.“ესტეს” იცნობენ მსოფლიოს უმეტეს მხარეში, მისი პროდუქცია ასოცირდება ხარისხთან. ეს ბრენდი მუდმივად შთააგონებს ქალებს, რომ სილამაზე ყოველთვის თავდაჯერებულობიდან მოდის. გიგანტური კოსმეტიკური იმპერია თამამად იკავებს მყარ პოზიციებს სილამაზის ინდუსტრიაში.
წარმოიდგინე, რა რთულია, შექმნა ისეთი ბრენდი, რომელიც წლებთან ერთად არასდროს კარგავს აქტუალობას, რომელიც ყოველთვის პირველობისთვის იბრძვის, რომლისთვისაც მნიშვნელოვანია, – იყოს მაგალითი სხვებისთვის. დიახ, ზუსტად ასეთია “ესტე ლაუდერი”, რომლის უკანაც ძლიერი ქალი დგას.
ყველაფერი ოჯახური ბიზნესით დაიწყო. კომპანია ცოლ-ქმარმა, ესტე და ჯოზეფ ლაუდერებმა დააარსეს, მათ ბიზნესი მხოლოდ 4 პროდუქტით დაიწყეს. პირველი საკუთარი მაღაზია კი 1948 წელს გახსნეს. 1953 წელს ბრენდმა მნიშვნელოვანი პროდუქტი წარადგინა, რომელმაც ააჭრელა სილამაზის ინდუსტრია. ეს იყო დასაბანი ზეთი, როგორც სხეულის სუნამო. შემდეგ იყო კიდევ ერთი მაღაზია ამერიკის ფარგლებს გარეთ, ამჯერად ლონდონში. 1962 წელს კი ესტე ლაუდერმა შექმნა მაკიაჟის ხაზი, ის, რაც დღეს ასე ძალიან გვიყვარს.
ებრაელი ემიგრანტების ოჯახში დაბადებული გოგონა, ესტე ლაუდერი ყოველთვის სილამაზისკენ მიისწრაფვოდა: “დედაჩემი იყო პირველი, ვინც სილამაზედ აღვიქვი”. ესტერს კარგად ესმოდა გაყიდვები და მარკეტინგი, გამოცდილება კი მამასთან მუშაობის დროს დააგროვა. ქიმიკოს ბიძასთან ურთიერთობამ ესტერი კოსმეტიკით “მოწამლა”.
“ჩემი კრემები მხოლოდ ნატურალური ინგრედიენტებისგან მზადდება”, – დიახ, ეს არის კოსმეტიკური ბრენდის მთავარი ღირსება, პროდუქცია, რომელიც სწრაფად და ეფექტურად აუმჯობესებს კანს. 1985 წელს ესტე ლაუდერზე ფილმი გადაიღეს სახელწოდებით – “ესტე ლაუდერი: წარმატების ტკბილი სურნელი”. ფილმში ესტე საკუთარი წარმატების ფორმულას გვიზიარებს: “არც ერთი დღე მიცხოვრია გაყიდვების გარეშე. თუკი მე რაიმესი მწამს, მას მომენტალურად ვყიდი, ვყიდი თავდაუზოგავად!” რთულია, არ დაეთანხმო, განსაკუთრებით დღეს…
Time-ს მიერ დასახელებულ მეოცე საუკუნის ბიზნეს გენიოსებს შორის ესტე ლაუდერი ერთადერთი ქალი იყო, – მართლაც შთამბეჭდავია. ის 2004 წელს, 97 წლის ასაკში გარდაიცვალა. ესტე ლაუდერი იყო ქალი, რომელმაც საკუთარი ბრენდი პირადად მიიტანა მომხმარებლებთან. დიახ, ესტეს პირდაპირი მნიშვნელობით ადამიანებთან დაჰქონდა სუნამოები, პარფიუმერია და ყველგან ყიდდა საკუთარ პროდუქციას, ქუჩაშიც კი. ესტე ლაუდერი იდეალურია მაგალითია, როგორ შეიძლება წარმატებული იყო ოჯახშიც და კარიერაშიც. ჯერ კიდევ მაშინ, როდესაც ფიქრობდნენ, რომ “ბიზნესში ქალების ადგილი არაა”, ესტე ლაუდერმა შეძლო, თანაც როგორ, – კოსმეტიკის იმპერია ააშენა.
არ ვიცი, სტერეოტიპულია თუ არა, მაგრამ, ვეთანხმები რომ ამბობენ: “ქალებს ასაკს არ ეკითხებიან”,-ო. ესტე ლაუდერი ამბობდა, რომ ასაკს არ აქვს მნიშვნელობა, “მთავარია, როგორ ბრწყინავ – სილამაზის საიდუმლო სწორედ ამაშია!” ჰოდა საყვარელი კოსმეტიკით თუ მის გარეშე, იბრწყინე ჩემო მკითხველო!
გამოყენებული წყაროები:
Fashionholics.online
Thediary.ge
marketer.ge
ფოტომასალა: Pinterest
