ყველა თავისებურად ცდილობს საკუთარი თავის გამოხატვას. თმის ფერი, ჩაცმის სტილი, მაკიაჟი, ვარცხნილობა, ტატუ … შეიძლება პატარა შტრიხმა ყველაზე დასამახსოვრებელი გაგხადოს. დღეს ბევრისთვის თვითგამოხატვის ერთ-ერთი საშუალება – პირსინგია.
რა არის პირსინგი?
პირსინგი გულისხმობს სხეულის სხვადასხვა ნაწილის გახვრეტას და გახვრეტილ ადგილას სამკაულის გაკეთებას. პირსინგს იკეთებენ, როგორც ქალები, ისე მამაკაცები. გავრცელებულია ცხვირის, ყურის, წარბის, ჭიპის, ენის, ტუჩის, ლოყების, ასევე გენიტალიების პირსინგიც კი.
ბოლო წლებია პირსინგი ძალიან პოპულარული გახდა, თუმცა ვერ ვიტყვით, რომ ის ახალია. ძველი ეგვიპტელები, რომაელები და ბერძნები პირსინგს სოციალური სტატუსის გამოსახატად იკეთებდნენ, ნაწილს კი სჯეროდა, რომ სამკაული მათ ბოროტი ძალისგან იცავდა.
ინდოელ ქალებში ცხვირის პირსინგი (ნესტოზე) ქმრისადმი მორჩილებას გამოხატავდა, ძველ რომში იულიუს კეისრის მცველები ძუძუს თავებზე იმაგრებდნენ რგოლებს, რაც სიმამაცესა და თავდადებას ნიშნავდა. პირველყოფილ ტომებში სწამდათ, რომ ყურზე პირსინგი მათ დემონებისგან დაიცავდა. იმ დემონებისგან, რომლებიც, მათი რწმენით, ყურიდან სხეულში აღწევდნენ.
ასეა, ყველას თავისი ახსნა ჰქონდა…
მნიშვნელოვანია, რომ პირსინგი პროფესიონალთან გაიკეთოთ, ვინც მაქსიმალურად იცავს ყველა სტანდარტს. პირსინგის ხელსაწყოები უნდა გასტერილდეს ავტოკლავით. სპეციალისტი აუცილებლად უნდა იყოს სერტიფიცირებული, უნდა იყენებდეს ერთჯერად ნემსებს, ხელთათმანებს და თქვენ თვალწინ უნდა ხსნიდეს სტერილურ ყველა საჭირო ნივთს.
არ დაგავიწყდეს, პირსინგის გაკეთებამდე უნდა იყო აცრილი ტეტანუსსა და B ჰეპატიტზე.
საინტერესო ფაქტები:
გერმანელი მოგზაური, რალფ ბულჰორცი პირსინგების რაოდენობით რეკორდსმენია. მას 453 პირსინგი აქვს, დიახ 453 :)) ჭიპის პირსინგი ფართოდ იყო გავრცელებული ოსმალეთის იმპერიაში. ყველა გოგონა, რომელიც ცხოვრობდა ჰარამხანაში, იკეთებდა ჭიპის პირსინგს. ჭიპის გახვრეტა, ასე ვთქვათ, ხარჭის ნიშანი იყო. 1991 წელს ავსტრიის მყინვარში აღმოაჩინეს მუმია, რომელსაც ყურზე პირსინგი ჰქონდა.
ჰო მართლა, ჩრდილოეთ კორეაში ბევრ სხვა რამესთან ერთად, აკრძალულია სხეულის პირსინგები.
უამრავი ცნობილი ადამიანი ატარებს პირსინგს.
მაგალითად, შეიძლება თვალი მოგიკრავს ბრიტნი სპირსის ჭიპის პირსინგისთვის, რომელიც ხშირად ჩანს მის ვიდეორგოლებში. 2004 წელს კრისტინა აგილერამ გაიხვრიტა ენა, ყური და გენიტალიები, მან აღნიშნა, რომ “ეს იყო მტკივნეული, მაგრამ დამამშვიდებელი”. ვარსკვლავები ხშირად ხდებიან შთაგონების წყარო, სწორედ მათი გავლენით, უამრავი ადამიანი იკეთებს პირსინგს და ტატუს, ბაძავენ მათ სტილს და ინტერესით აკვირდებიან ყოველდღიურობას.
გამოხატე შენი თავი, არ აქვს მნიშვნელობა, სხვები რას იტყვიან, მთავარია შენ მოგწონდეს და საკუთარ თავთან იყო ჰარმონიაში.
გამოყენებული წყაროები:
aversi.ge
on.ge
primetime.ge
kvirispalitra.ge
ფოტომასალა: pinterest
